與你共度平安夜 亞運英雄星語心願

李慧詩想去聖城

（單車女子500米計時賽金牌、爭先賽銅牌）

我係一位基督教徒，所以聖誕對我嚟講好重要，但由於要兼顧比賽同訓練，所以○七年到依家都無再喺香港過聖誕，而今年亦都唔例外！不過，我嘅聖誕願望當然係想喺聖城耶路撒冷度過，但呢個夢想相信要等我退役之後，先會有「假期」嚟實現！

黃蘊瑤讀多啲書

（單車女子記分賽銀牌）

為咗訓練同比賽，我哋基本上一年內有十一個月時間都係與世隔絕，同「一般人」脫晒節！所以我嘅願望係想過番啲「普通人」生活，可以接觸多一啲新事物、或者係讀多啲書，例如經濟學我就好有興趣去鑽研！

張小倫要做廚神

（劍擊男子花劍個人賽銀牌、團體銅牌）

除咗打劍之外，我最鍾意嘅就係食嘢，所以假如有一日我退役，一定唔會再從事有關劍擊嘅職業；反而想嘅係從事飲食業，做個「花劍廚神」，拍住我做廚師嘅細佬一齊打天下，專攻內地龐大市場！

李嘉維留守香港

（空手道男子75公斤級銅牌）

見到唔少運動員都想出外度聖誕，我反而想留喺香港同家人、女友去歡度佳節！因為近呢幾年自己為咗空手道，聖誕節期間都唔可以陪佢哋，難得今年喺亞運後有段長假期，當然要珍惜呢次難得機會。

張小倫

李嘉維

劉彥恩東瀛之旅

（游泳女子4ｘ100米混合泳接力銅牌）

由細到大我都好鍾意埃及呢個地方，好想親身去睇吓金字塔、獅身人面像等靚靚古蹟！不過，呢個願望今年聖誕一定實現唔到，因為我依家已經飛咗去日本旅行……哈……哈哈……埃及之旅就留番下年啦！

馬希彤漫遊花都

（游泳女子4x100米混合泳接力銅牌）

我好想聖誕喺巴黎度過！因為巴黎鐵塔好靚同埋好浪漫，如果再加埋喺嗰度唔使畀錢任玩、任買、任Shopping就最好，咁就一定可以拋開晒之前所有壓力及煩惱！

鄭曉為做孝順女

（劍擊女子花劍團體賽銅牌）

雖然我只係得十五歲、同埋仲係學生，但今次喺亞運我得到五萬蚊獎金。咁大個女第一次「出糧」，喺今個聖誕我決定要做個孝順女，請晒爸爸同媽媽去台灣旅行，一家人玩番餐就最好嘞！

蘇文欣大擦一餐

（桌球女子6個紅球團體金牌）

為咗攞到更好成績，近日我已經積極減肥令自己狀態更Fit！但聖誕佳節期間，確實又好難去忍口，所以我嘅願望係想喺無後顧之憂下，食一餐豐富嘅聖誕大餐，如果能夠食幾多都冇影響就最好！

鄭曉為

蘇文欣

吳安儀白色聖誕

（桌球女子6個紅球團體金牌、單打銅牌）

我認為聖誕節一定要落雪先至夠正宗，所以自細都好想過一個白色聖誕，但咁耐都未試過！我啱啱喺敍利亞打完世界業餘賽返嚟，如果遲番一個禮拜就可以夢想成真，真係可惜！

葉蘊妍良朋共聚

（桌球女子6個紅球團體金牌）

有乜聖誕願望？我諗一諗先……其實我係一個好易滿足嘅女仔，而喺聖誕期間我亦收到好多朋友嘅祝福同禮物，已經好開心嘞！如果要講願望，咁我就希望同所有關心我嘅人一齊去歡度佳節啦！

吳安儀

葉蘊妍

圖、文：司徒子文、李芷韻、Carrie、Maggie Wong