曉頓成英超首位被炒領隊！紐卡素前日突然宣布與領隊曉頓結束賓主關係，原因相當荒誕，當中包括同球員太Friend，唔識高調搶頭條，以及老細玩完Fantasy Football知道球隊戰績欠佳等。盛傳領隊一職，將會由剛辭去阿積士教練嘅祖爾接手，英國博彩公司亦將佢列為接棒大熱。
曉頓上季帶領紐卡素升上英超，雖然目前僅排十二位，而且近五場聯賽不勝，但今季亦踢過多場代表作，包括東北打吡大勝新特蘭五比一、主場大勝維拉六比○及作客阿仙奴贏一比○，以一支升班球隊嚟講，表現已有交代。
紐卡素領隊一職向來唔易做，由於球會歷史悠久，球迷眾多，加上班主出名麻煩，所以自卜比笠臣○四年離隊後，紐卡素已先後用過七位領隊，冇一個做得長。但正所謂同人唔同命，當年艾拿戴斯被炒獲四百五十萬鎊賠償，曉頓今次只得二十萬鎊！
據英國傳媒報道，曉頓被炒三宗罪包括同球員太Friend，搞到班o靚冇大冇細；平時太過低調，唔識搞宣傳同缺乏公關技巧。不過最頂癮都係班主艾殊利玩完Fantasy Football（足球經理人遊戲），知道隊波今季聯賽僅排十一位，所以有「先見之明」早一步炒咗曉頓先喎，希望換完領隊之後，紐卡素唔會降班啦！