賄賂FIFA要員吓吓用錢未必行得通，但出動到女人就唔同講法，FIFA會長白禮達一樣難過美人關！據英國傳媒爆料，呢位國際足協巨頭曾向倫敦市長約翰遜透露獲申辦國派美女招待，色字頭上一把刀，呢位老人家都係好自為之啦！
英格蘭申辦世盃失敗後，當地傳媒積極唱衰白禮達，今次踢爆佢試過畀申辦國用特別招數「賄賂」，消息仲係來自倫敦市長約翰遜。據報白禮達曾經同約翰遜閒聊期間自爆有申辦國派美女埋身，佢明知身份尷尬但都毫無避忌，仲夠膽死講到眉飛色舞，話班女仔正到爆喎。
白禮達擅於利用權力搵着數，佢不嬲都係好色一族，之前曾擔任另一個組織頭目，失驚無神發起騎呢行動，游說女人着性感絲襪，仲話喺舉辦活動期間見過唔少索女，話唔定又趁機抽水，絕對係如假包換嘅鹹濕伯父。不過，由於英國傳媒指控並冇真憑實據，相信都影響唔到白禮達。
另外，英國《太陽報》又有料爆，指俄羅斯總理普京喺世盃主辦權公布前，由特工安排密會多名國際足協委員，估計佢曾親自面對面游說最少八個委員支持俄國申辦團隊，話唔定佢哋已經一早傾掂數，所以普京先淡定到冇去蘇黎世出席最後競選大會。