維基解密（Wikileaks）爆料風暴吹到球壇，揭露緬甸軍政府領袖丹瑞曾於○八年年底至○九年一月期間計劃用十億美元（約七十八億港元）收購英超球會曼聯五成六股份，藉以分散受風災折磨嘅國民注意力，但最後連佢自己都無法接受呢個天真想法，結果改為成立緬甸足球聯賽，實行「與民同樂」，曼聯得以逃離獨裁者魔掌。
維基解密披露一份密電，顯示緬甸○八年受颱風納基斯吹襲，造成十四萬人死亡，國內一片愁雲慘霧，其後丹瑞孫兒獻計救國，建議爺爺以十億美元收購曼聯，希望轉移國民視線。據悉，現年七十七歲嘅丹瑞係紅魔球迷，起初對呢個建議甚為受落，但再經考慮之後，覺得人民受災時斥巨資收購外國球會似乎唔適合，於是打消念頭，亦未曾同曼聯管理層接觸過。
雖然丹瑞取消買紅魔鬼，但佢並冇用該筆資金賑災，而係成立緬甸足球聯賽，似乎想滿足個人及孫兒對足球嘅興趣，多於為人民解困。根據○四年統計，緬甸國民人均生產總值只有三百五十六美元，比二次世界大戰前更低，丹瑞好大喜功做法令人髮指。
美國商人格拉沙○五年以借貸方式收購曼聯之後，令球會負債纍纍，並惹來球迷強烈反對，多次傳出格拉沙有意出售球會。丹瑞孫兒或者收到風，建議爺爺接手，不過即使丹瑞當時真係拍板收購曼聯，估計冇咁容易，因為英超賽會設有班主背景審查制度，對外國買家限制甚嚴，丹瑞被列為世界上最惡劣獨裁者排行榜第四位，相信無法通過審查。
本報綜合報道