亞運變「亞洲單車賽」
由亞運獎牌日Day1嘅李慧詩揭開序幕，人強馬壯嘅香港單車隊至尋日Day6表現都勢如破竹，日日添獎牌未有斷纜，小記見到佢哋台前幕後嘅付出得到回報，都戥佢哋開心埋一份。亦因為單車隊咁醒，採訪亞運就好似變咗採訪「亞洲單車賽」，情況就好似上屆多哈亞運嘅香港乒乓球隊一樣。
朝夕相見嘅情況下，小記對單車運動嘅了解已急速「升呢」，同教練與車手們亦Friend咗好多，仲約定李慧詩日後用獎金買咗村屋之後去燒嘢食添！
今日我又會去採訪ＢＭＸ，港隊有王史提芬同韓理強兩大王牌在手，小記相信港隊大有機會穿金戴銀，延續日日有牌攞嘅勁勢。