火箭在續缺姚明及布魯克斯兩大主將之下，尋日於主場以92比95不敵公牛，終止連勝走勢，而公牛贏波後則造出四連勝。雖然火箭失利，但賽後有指「小巨人」姚明將會在本月廿三日對鳳凰城一役復出，總算有番個好消息。至於轉戰歐洲嘅「壞孩子」艾佛遜，首次為新會披甲就輸波。
近期飽受傷患困擾嘅火箭，今場續缺姚明、布魯克斯及布丁加，陣容頗為不整。不過火箭總算不落下風，尤其係第三節，完節前打出一段11比0攻勢，一度領先公牛8分。可惜火箭及後又再患上第四節失準毛病，開節後連續5分鐘未有得分，被公牛打出一段18比0攻勢反超，最終公牛保持優勢反勝95比92。
公牛領袖戴歷羅斯今場續有好表現，個人攻入全場最高33分及7次助攻，而鄧格亦貢獻16分及10個籃板球。公牛贏波後，總算為「馬戲團之旅」打下一支強心針，因為公牛主場館每年都因舉行馬戲表演，需要球隊遷就，今次就要一口氣打七場作客比賽，緊接仲有六場硬仗等緊佢哋。
至於姚明傷勢已有好轉，不過預期佢唔會參與球隊之後兩場作客比賽，據美國傳媒指出，「小巨人」好有可能喺香港時間本月廿三日，於主場復出對鳳凰城。另一方面，艾佛遜加盟土耳其球隊比錫達斯後，尋日首度上陣出戰歐洲盃，雖然佢上陣23分鐘攻入15分表現不俗，但球隊最終仍以91比94不敵塞爾維亞球隊赫莫法姆。