小記來到廣州採訪亞運，不經不覺已經第十日，大部分時間都係追蹤港隊備戰同比賽情況，經過首五日正式比賽日，睇到港隊穿金戴銀，成績彪炳確實好開心。由於比賽時間及工作分配關係，全港記者都冇可能見證港隊所有獎牌誕生，所以各國有獎牌榜之外，行家之間亦有「採訪獎牌榜」，小記暫時以見證港隊奪兩金三銀一銅，名列前茅。
唔係賣花讚花香，小記能夠多次第一時間採訪到港隊攞牌，覺得自己真係幾好腳頭，講到賽事舉行以來，令小記印象最深刻嘅場面，並非港隊奪得金牌，而係黃蘊瑤同黃金寶所攞到嘅兩面單車銀牌，黃蘊瑤永不放棄，忍痛堅持比賽到底，令人感動萬分。
至於三十七歲嘅黃金寶早已成為香港單車界Icon，多年來不斷為港爭光，值得向佢致敬，能夠親身見證呢兩面獎牌誕生，令小記今次亞運之旅更添意義。小記希望未來比賽日繼續保持好腳頭，每次採訪港隊，佢哋都有牌落袋，令小記做埋「金牌記者」。