在賽會努力聯絡下，巴拉圭「手機乳神」拿莉莎定於下周二（十六日）早上抵港，為下周三（十七日）大球場舉行的國際熱身賽巴拉圭作客香港之戰造勢。但原來巴拉圭國家隊好怕拿莉莎，已知會香港足總，此行要同「乳神」劃清界線，避免國腳受影響。
拿莉莎雖自稱巴拉圭頭號粉絲，國家隊卻對她敬而遠之，巴拉圭此行將下榻於紅磡海旁一間酒店，並已向香港足總表明，拿莉莎在港一切活動均與國家隊無關。
不過有啲嘢係避無可避，巴拉圭當然無法禁止拿莉莎入大球場睇波，而「乳神」下周二來港後，立即在紅磡另一間酒店召開記者會，不過，若拿莉莎喺紅磡行街「撞到」巴拉圭球員，到時都吹佢唔脹！
拿莉莎遠道來港，當然唔只睇波咁簡單，賽會表示，會安排「乳神」周二晚去旺角行人專用區同市民接觸，透過購票通購買門券，更有機會得到拿莉莎親筆簽名球衣或靚相。
至於巴拉圭大軍將於日內分批來港，球隊人腳再有變動，世盃國腳增至十人，其中射手辛達告魯斯更於周日（十四日）率先殺到，準備比賽。
足總昨亦選出香港隊名單，今日在九龍仔開操，陳偉豪、李志豪、郭建邦、盧均宜四位亞運腳，以及受傷的陳肇麒均入選，相信屆時港隊人腳需視乎港隊在亞運港足的戰況而定。