雷阿倫領塞軍再滅火
【本報綜合報道】新不如舊！「熱火三巨頭」尋日繼開鑼戰後，再度迎戰東岸勁敵塞爾特人，結果「新三巨頭」始終敵唔過「舊三巨頭」，塞軍有雷阿倫着火射入7個三分球，加上拍檔加納特及皮雅斯都有上佳表現，作客以112比107贏波，今季兩度擊敗雷聲大雨點小嘅熱火。
近期戰績低迷嘅熱火，開賽已被塞軍壓住嚟打，塞爾特人完上半場後已領先15分之多，雖然熱火後段回勇，在完場前13秒更一度追貼至3分距離，可惜及後被雷阿倫入兩記罰球鎖定勝局，最終塞軍以112比107贏波。
姚明輕傷只抖一周
今場焦點必定係「Ray Gun」雷阿倫又試連環「開槍」，呢位老將三分球9射7中，手感好到不得了，結果全場攻入35分，成為頭號贏波功臣。至於其餘兩巨頭加納特及皮雅斯亦功不可沒，KG加納特攻入16分及搶下13個籃板，而皮雅斯則射入25分。雖然「大帝」勒邦占士今場表現亦都對辦，個人攻入35分，但因韋迪表現低迷，全場12射僅2中得8分，成為輸波關鍵之一，而今場已經係熱火今季第4次輸波。
湖人同日亦以112比118不敵金塊，終止連勝紀錄。至於前日對巫師受傷嘅姚明，尋日已完成磁力共振檢查，證實未有出現結構性損傷，腳傷並唔嚴重，火箭預計佢至少要休戰一周。
賽果放送
公牛 120:90 勇士
熱火 107:112 塞爾特人
金塊 118:112 湖人
註：前者主場