國足賽前收到好消息之餘，同樣亦有壞消息！可喜係上場被球證誤逐離場嘅呂鵬上訴得直，已獲撤銷紅牌，可以在今場生死戰候命。可惜係陣中「新人王」鄭錚因患上肺炎已經離隊，不能再於今屆賽事上陣，令國足缺少一員猛將。
國足中場呂鵬上場因球證擺烏龍，誤以為佢已領取兩張黃牌而將其罰紅牌出場，結果中國賽後作出申訴，賽事紀律委員會了解事件後，已決定撤銷呂鵬嘅紅牌，意味佢今日可以登場。但國足同時亦收到不利消息，左閘鄭錚證實患上肺炎，並已經離隊。此外首席門將王大雷仍被內部停賽，今場會續由張世昌把關，論經驗冇咁好。