3大控衞翻轉NBA

上季曾轟入55分而一鳴驚人嘅真寧斯，尋日又試嚇人一驚，領軍面對山貓攻入20分、10個籃板及10次助攻，獲得職業生涯首個「三雙」。真寧斯賽後就興奮指出：「今場肯定係我加入NBA以嚟打得最好嘅賽事，因為我既能為球隊得分，亦唔自私向隊友作出傳送，有當上主角嘅感覺。」隨住真寧斯嘅爆發，公鹿成功於主場以98比88擊敗山貓，客隊輸波後已開咧三連敗。

至於公牛領袖戴歷羅斯，面對態沉嘅活塞就罕有地瘋狂飆分，全場起手27次中13球，命中3個三分球，合共轟入39分之多！不過羅斯仔亦冇因為飆分而減少傳送，佢今場亦貢獻7次助攻及6個籃板球，表現全面，羅斯賽後未敢邀功：「我要感謝隊友對我充滿信心，不斷製造空位畀我，令我可以輕鬆投射，所以我同自己講唔可以辜負佢哋，要盡量得分！」公牛最終以101比91輕取活塞，打開今季勝利之門。

黃蜂挫馬刺3連捷

另一個爆發PG就要數全面回勇嘅基斯保羅，「蜂王」上季因傷足足缺陣37場賽事，今場遇上西岸勁敵馬刺，保羅射入全場最高25分，並搶得7個籃板球、5次助攻及2次偷波，成為贏波最大功臣。

「蜂王」表示：「冇任何感覺比得上能夠再度重返球場比賽，我會繼續抗爭到底！」黃蜂今場作客以99比90擊敗馬刺後，開咧三戰全勝，暫與拓荒者一樣成為西岸最佳。

戰果放送

鷹　隊 99:95 巫　師

騎　士 104:107 帝　王

紐約人 95:100 拓荒者

公　牛 101:91 活　塞

溜　馬 99:86 ７６人

灰　熊 109:89 木　狼

火　箭 94:107 金　塊

公　鹿 98:88 山　貓

馬　刺 90:99 黃　蜂

註：前者主場