金塊殘陣等爵士劏

（now 635周四早上９時直播）

西岸勁旅金塊今季轉變唔大，最成功算係留得住安東尼，並加入艾爾夏寧頓及舒頓威廉士兩名前鋒，整體陣容都算有一定強化，此外教練卡爾亦能壓制癌病復出領軍。不過，金塊季前將會缺少兩大前鋒，簡安馬田在今夏完成腳部手術，仍需養傷一段時間，至於「鳥人」基斯安達臣，同樣要養傷至十二月。新兵艾爾夏寧頓亦只係剛剛傷愈，早前佢因為左腳傷患已休養數個星期，而中鋒連尼就因扭傷左腿無法操練，今場亦上陣成疑，金塊傷患問題的確頗為嚴重。

勇士對火箭 林書豪姚明打對台

客隊爵士就冇呢個問題，而且狀態非常之好，係今季ＮＢＡ季前賽其中一支長勝將軍，八戰全部贏晒，可見布沙離隊對球隊影響唔大。事實上，爵士今季已補充中鋒艾爾謝法臣，加上米沙比愈見成熟已可擔大旗。再者，布沙離隊後，爵士似乎更為團結，所以今場作客金塊，大有機會乘季前賽勇態，打開勝利之門。

另外，周四早上勇士對火箭亦值得留意，事關美籍華裔新星林書豪有機會粉墨登場，這位哈佛大學控球後衞，打法酷似拿殊，暑假時在夏季聯賽大放異彩，獲得一紙合約，今仗有機會與火箭的中國中鋒姚明打對台。