日聯盃四強球隊過去周日打生打死，磐田山葉及廣島三箭次回合作客苦戰後晉級決賽，休息兩天今日分途出戰天皇盃第三圈賽事，磐田山葉主場對甲府風林，廣島三箭主場對福岡黃蜂，兩支主隊未必回到氣，兩場揀晒「讓球客勝」！
（周三晚6時開賽）
先講磐田山葉，大軍上周作客川崎前鋒贏三比一踢出本季代表作，成功殺入日聯盃決賽，士氣甚佳。不過，隊中王牌射手前田遼一剛代表日本國家隊，就算趕及歸隊，相信亦難發揮最佳水平。山葉本身兵源唔算多，剛於客場搏得咁盡，加上已取得日聯盃決賽資格，幕後人話唔定會有取捨，戰意成疑，讓波絕對唔抵玩。
另一邊廂甲府風林今季喺日乙表現平穩，作客仲零舍醒神，自三月初作客不敵福岡黃蜂後，球隊至今保持十三場作客不敗。大軍現時位列日乙次席，升班機會甚高，球隊前線擁有路爾斯馬蘭夏奧、保連奴同夏雲拿等優質攻擊球員，士哥能力甚強，而且有九日時間備戰，今場越級挑戰絕不輸蝕，受讓值得捧場。
跟住睇埋廣島三箭嗰場，三箭主力前鋒佐藤壽人有傷在身，需要繼續休戰，另一射手山崎雅人亦成十字軍，前線靠晒李忠成，此子近期腳風頗順，但經過連場搏殺後，難免會有疲態，就算主場出擊亦冇優勢。福岡黃蜂早前曾經連贏六場，近期連輸兩場回氣，今次一眾球員抖夠於盃賽搏殺，賽事法定時間打和即加時30分鐘，未分勝負即互射12碼決勝。