嚟緊一個禮拜係國際賽事日，世界各地嘅聯賽統統停晒，讓路畀國家隊比賽，以往呢啲日子，我哋波總都冇乜反應，今季開始就唔同嘞，大港腳遠征印度，而即將出戰亞運會嘅小港腳，亦準備去寶島打四角賽，一試身手。
，將會連踢三場，對手分別係中華台北、菲律賓同澳門，喺唔少識波之士眼中，佢哋合稱「魚腩三寶」，以港隊嘅能力，此行要橫掃捧盃易如反掌，心態上唔多唔少都會稍為輕敵。
不過，我哋香港隊又有幾多料？香港足球資源貧乏，大港腳甚少比賽，一踢世盃同亞洲盃等大賽，莫講話出線，想攞分都好困難，至於班小港腳，佢哋國際賽經驗少得可憐，一年只得三幾場比賽，一踢亞運同奧運至知自己唔夠班，已經恨錯難返。
睇番上屆多哈亞運，小港腳喺缺乏準備下，只能逼和印度，輸畀伊朗，小勝馬爾代夫一粒，結果首圈出局，至於奧運外圍賽就更令人失望，不敵日本都算正路，但主場輸畀孟加拉同馬來西亞，就可能同國際賽經驗不足有關。
今次波總跟番國際賽事檔期，為大、小港腳安排比賽，算係一個唔錯嘅起步，港隊嘅技術同經驗，係要慢慢累積返嚟，之後再提高要求爭取成績。小港腳今次征戰寶島，最終目標係踢好亞運，比起以往出席大賽前打「天才波」，今次肯花時間熱身，已經係一大進步啦！