正在三水集訓嘅晨曦足球隊，昨在最後一場友賽以2比1反勝甲組新軍屯門，前來試腳嘅加拿大小國腳陸志豪為球隊射入奠勝一球，而晨曦在九月三日聯賽揭幕戰嘅對手大中，更派出教練狄恩到場「吼路」。
晨曦教練列卡度原希望以此戰來測試球隊進攻力，在番禺集訓前來三水比賽嘅屯門，憑馬肇均射門擦中晨曦球員改變方向入網，開賽十三分鐘意外先開紀錄。
下周五將於聯賽揭幕戰火併大中嘅晨曦，今趟可謂冤家聚頭，大中剛巧亦喺三水訓練基地集訓，今季至執掌大中教鞭嘅狄恩，更坐在看台觀戰，晨曦未完半場已收起賓曹及謝敏榮，看來係保留實力，但完半場前仍靠巢鵬飛窩利抽入扳平。
換邊後賽事變成雨戰，完場前五分鐘，前加拿大U17小將陸志豪禁區頂起腳，皮球省中對方慢流尾袋，晨曦亦靠呢個幸運入球險勝2比1。
列卡度賽後否認因狄恩吼路而留力：「球隊仍在尋找最佳配搭，至於一班試腳球員去留，心目中已有決定，不過要待返港後再與會方研究。」
屯門此役有中場美高受傷缺陣，另外三名塞爾維亞外援米亞、米奇及比傑都有上陣，教練盧光中對球隊表現感到滿意，並透露開咧前會再安排兩至三場熱身賽。
光頭仔三水直擊