女人最疼Water Polo
夏日炎炎，想玩得激但又唔想搞到成身臭汗，愛靚嘅「潮女」可以點揀？去游水，雖然可以消暑但「齋游」又好似悶悶哋；去打波，又怕熱辣辣出晒汗勁辛苦，咁點算好呢？好彩仲有一項運動叫水球（Water Polo），唔單止好似球類競賽咁激烈，仲全程浸喺泳池唔怕熱，絕對可以成為「女人最疼（愛）」的消暑運動！
水中激戰唔怕黐立立
女士們玩運動，十居其九都係為減肥或者貪刺激，但有唔少好怕搞到成身臭汗，諗法真係好矛盾！依家讀緊澳門科技大學嘅「潮女」吳翠麗，喺八年前就搵到「人生最疼」：「我本身係游泳運動員，但一直喺泳池度游嚟游去，訓練方式刻板，都真係幾悶。不過，自從○二年自己接觸咗水球之後，就完全着迷，因為競爭性強、過程千變萬化，就好似喺水入面踢足球一樣咁刺激！最重要嘅係打水球嘅體力消耗好勁，一方面可以Keep Fit、但又唔使畀啲汗搞到『黐立立』，都真係幾爽！」
依家已成為澳門代表隊主力嘅阿麗補充說，打水球係唔可以觸碰池邊及池底，所以球員喺爭波、射波嘅同時，要無間斷咁「踩水」浮面，運動量一啲都唔嘢小，絕對係女士減肥妙方！
成Team人玩好Happy
早前以隊長身份、率領澳門贏得「Panasonic第十二屆亞太區水球賽」亞軍嘅李思雅就認為，領略團隊精神係佢最大得着：「游水係好個人嘅運動，只需要喺自己嘅線道游得快就OK；但水球就好唔同，一定要同隊友配合，一齊經歷過刻苦訓練、亦可以一齊享受勝利喜悅、當然包括輸波失落，呢啲都係由團隊贏番嚟嘅友誼，特別珍貴！」
圖、文：司徒子文