完美OL導遊夢劇院
今年係奧脫福一百周年，紅魔鬼球迷又點可以放過朝聖好機會？今次由靚女主持盧曉蓓（Eva）親自帶隊，話畀各位球迷聽「夢劇院」究竟有乜精彩回憶！
Eva鍾意朗尼碧咸
奧脫福參觀團喺非比賽日都有得參加，雖然入場費高達十三鎊（約一百五十八港元），但球迷依然源源不絕，球迷除咗可以參觀更衣室、喺曼聯後備席上拍照留念，仲可以喺曼聯博物館參觀同買紀念品。
Eva曾奪得香港完美OL選美冠軍，究竟OL又最鍾意邊位球星？「我最鍾意碧咸同朗尼，最愛球隊當然係曼聯啦，所以今次嚟到奧脫福球場，心情特別興奮！」難怪Eva見到碧咸張相，即刻要同偶像合照啦，去到更衣室見到朗尼件波衫時，更唔捨得走。
十三歲已開始模特兒生涯嘅Eva，雖然個樣「鬼鬼哋」，但卻係香港土生土長，細個喺國際學校讀書，除咗做模特兒同主持外，仲拍過雲翔導演嘅《永久居留》。Eva睇波經驗都相當豐富，除咗睇過英超外，○六年世界盃決賽都係座上客，世界盃期間則為內地網站主持節目。
通宵睇波好亢奮
Eva話主持、電影及model工作都咁鍾意，希望可以多方面發展，嘗試唔同工作：「其實我好鍾意運動，每日都會做gym，另外亦鍾意打籃球，今年六月時，睇完世界盃再直踩睇埋NBA Final，一啲都唔會覺得眼瞓，一有波睇我就會好亢奮㗎喇！」