熱火組「超級三巨頭」先勝一仗！據NBA官方公布，熱火在目前嘅商品銷售遙遙領先其他廿九支隊伍，其中「三巨頭」統統打入球衣銷售頭五位。此外熱火季票銷情亦非常理想，有專家估計「三巨頭」熱潮將會為佛羅里達州南部帶來十億美元（約七十八億港元）嘅經濟收益，絕對係一隻「金蛋」。
自從勒邦占士決定加盟熱火之後，整個邁阿密市都一片歡騰，全因眾人深知「大帝」嘅吸金能力，各方面都可為邁阿密帶來難以估計嘅收益。NBA官方日前表示，熱火在新一季嘅商品銷情壓過湖人，單在球衣銷售方面，勒邦占士、韋迪及保殊就排在前五，歷來都很少有類似情況出現。
此外，現時所有佛羅里達州南部商人都爭相推出「三巨頭」商品，就連漢堡店都要推出「大帝漢堡」應市，可謂商機處處。因「三巨頭」預計會在熱火至少合作六年時間，有專家指出，三人將會為佛羅里達州南部帶來十億美元經濟收益。
另方面，有消息指「蜂王」基斯保羅已向黃蜂提出離隊要求，原因係球隊缺乏爭勝本錢，據悉保羅最有可能被交易至紐約人或魔術，若然佢能夠轉投紐約人嘅話，有指明年將成自由身嘅安東尼，亦會選擇在一一年加盟紐約人，與史杜迪米亞及CP3組成「三巨頭」。至於湖人則剛簽下兩老將「封阻王」韋列夫及魔術嘅班尼斯。