阿伯球員反轉尖沙咀

在領隊麥利殊頒下嚴令禁止球員「四圍Wet」下，周四抵港的伯明翰大軍兩日來屈在酒店，球員變晒宅男留在房內上網玩「面書」，昨日周末晨操之後，球員終獲半日假期鬆番吓，二話不說立即列隊出巡，大半隊球員前往遊人眾多的尖沙咀行逛，感受香港大都市的熱鬧氣氛，只不過球星們睇嚟相當「孤寒」，喺大部分舖頭都係齋睇唔買。
伯明翰後衞列治維喺ＬＶ出嚟兩手空空。
伯明翰後衞列治維喺ＬＶ出嚟兩手空空。

為顧及安全，伯明翰球員出行都獲安排旅遊巴接送，由下榻的紅磡海逸酒店直驅尖沙咀廣東道，同行球員幾乎大半隊伯明翰正選，包括門將米克泰萊及賓科士打，隊長卡爾，球員列治維、保耶及菲臘斯等。

賓科士打攞住小小戰利品返酒店好開心。
  • 賓科士打攞住小小戰利品返酒店好開心。

齋睇唔買多混吉

由於屈在酒店多日，今次出巡個個心情興奮！在外國人眼中，尖沙咀最旺係乜？梗係電器舖啦！他們在尖沙咀第一站就係去海運大廈行電器舖，手提電腦、手機、相機、電視，連ＤＶＤ舖都唔放過，左行右行，問長問短，搞完一大輪，最後原來只係齋睇唔買。

之後大夥兒轉戰廣東道一帶的名店，球星們先行殺入ＬＶ，但睇來睇去都落唔到手，兩手空空出來。惟賓科士打行完其他舖頭後，諗來諗去都係忍唔住手要再度折返ＬＶ，買了一小袋戰利品出來。至於保耶都有到Ｄ＆Ｇ出手掃貨。買夠行夠，球員們又乖乖地上車回程返酒店，至晚上留在酒店用饍，至午夜前都未有出外。

伯明翰球員喺海運大廈商場蹓躂。
  • 伯明翰球員喺海運大廈商場蹓躂。
保耶（右）同卡爾（左二）喺電器舖四圍望。
  • 保耶（右）同卡爾（左二）喺電器舖四圍望。