黎新祥的友人徒弟均對恩師辭世大表傷感，其昔日同袍曾偉忠、「大弟子」李健和及山度士，以及一班現役港隊球員，均表示會永遠懷念黎Sir，甚至港隊昨以大勝澳門，球員亦將捧盃的興奮拋諸腦後，心情變得沉重。
黎Sir「大弟子」李健和表示，由自己開始做球員，到現在擔任青訓教練，都受過黎Sir指點：「我初入銀禧係82年，最初學踢波已經跟黎Sir，到07年我短暫出任港隊教練，亦係黎Sir推薦，佢對我真係有好大恩惠。」
先後做過足球先生、最佳教練的山度士，最欣賞黎Sir全心全意為港隊：「我16歲踢港青已經跟黎Sir，佢出名好惡好嚴，我成日畀佢鬧，到後來我先明白管教嚴厲先至出到好球員。」山度士又謂：「黎Sir另一作風係唔會出賣港隊利益，好多教練都怕咗球會班主，但黎Sir我行我素。」
港隊隊長盧均宜想起黎Sir，一時感觸落淚：「我一出道已經是跟黎Sir，最難忘有次出戰全運會，球隊本來和波就可出線，但因為我的失誤，結果輸波，我難過得哭了出來，黎Sir卻跟我說：『傻仔，喊咩呀？你仲有咁多場波，一定要踢呀！』我覺得他就像我的親人一樣鼓勵着我。」足總總幹事袁文川表示，足總一直有支薪予黎Sir，黎Sir離世，足總向他的家人致以深切慰問，有需要時予以幫助。