【本報綜合報道】總決賽球證哥羅福向來被指係「湖人甜心」，皆因呢位光頭判官，在過去三季曾經17次執法湖人嘅季後賽賽事，結果「紫金兵團」錄得14勝3負，難怪被視為湖人福星。
塞爾特人主將雷阿倫在首回合賽後，就率先炮轟哥羅福偏袒湖人：「當我哋早段不斷被吹罰時，已知會讓對手控制球賽，我的確不滿球證嘅判罰，就好似第5犯，我完全掂唔到高比拜仁，但球證竟然吹我犯規，我諗我哋要從新適應球證嘅尺度。」至於高比仔賽後亦承認從此獲益，似乎哥羅福確有偏幫之嫌。
其實塞爾特人今季已唔係第一次受到哥羅福「厚待」，好似早前對魔術嘅第5回合，哥羅福就冤枉地趕柏堅斯出場，反而杜域侯活㬹頭橫行，並打傷格連戴維斯就冇受罰！賽會及後承認哥羅福吹錯，收回柏堅斯嘅技術犯規。