湖人闖決賽鬥太陽
湖人、魔術攜手橫掃對手殺入分岸決賽！衞冕冠軍湖人果然係爵士剋星，尋日憑加素貢獻33分及14個籃板球，加上高比拜仁續攻入「30+」得分，結果兩人協助「紫金兵團」以111比96輕勝爵士，在西岸準決賽連贏四場晉級，且連續三季淘汰爵士！東岸方面魔術藉「飛人」卡特遠程炮射死鷹隊，同樣以４比０橫掃對手。
為免夜長夢多，湖人作客鹽湖城當主場咁打，開賽後即向爵士施壓強攻，基於高比仔同加素今役都手風順暢，信心受動搖嘅爵士自然mark唔住兩大球星，結果上半場已大幅落後17分。湖人下半場保持優勢，最終以15分差距大勝對手，將與太陽於西岸決賽碰頭。
加素今場表現最佳，貢獻「雙雙」33分及搶得14個籃板球。至於高比仔亦投入32分，在今個系列賽中四場均獲得「30+」得分，同時高比亦有一項數據超越「波神」米高佐敦，就係與積遜教練合作下奪得第106場季後賽勝仗，較佐敦多出一場。
卡特着火射死鷹隊
東岸方面，鷹隊情況與爵士相近，今場早段已大幅落後，最終魔術贏98比84，連續兩圈都連贏四場橫掃對手。「飛人」卡特今場貢獻22分，其中三分球７射４中。而杜域侯活、劉易斯及尼爾遜亦同樣貢獻雙位數得分繼贏山貓４比０後，連續兩圈直落橫掃對手，卡特賽後豪情壯語，希望球隊能夠連勝16場奪冠。
本報綜合報道