明日NBA另一場重頭戲，由太陽主場對馬刺。太陽主將拿殊連續兩日缺席操練，未知能否趕及明早對馬刺嘅西岸準決賽首仗上陣，而呢位兩屆常規賽MVP上陣與否，亦成為太陽能否擊敗馬刺嘅關鍵。
今年已經36歲嘅拿殊表示，其實喺對拓荒者嘅第三回合已經受傷，之後兩場都係帶傷上陣，但去到上周五嘅第六回合，發現傷勢進一步惡化，單係第一節已罕有地出現6次失誤，結果該仗拿殊僅得10分，幸好太陽最終仍以9分擊敗拓荒者，總比數贏4比2晉級次圈。
拿殊表示：「打完上場波之後，有三日時間畀我休息，呢幾日我都唔會練波住，希望傷勢可好轉，趕及對馬刺上陣。」
太陽教練根特利表示：「拿殊同另一名傷兵羅賓盧比斯嘅傷勢唔算嚴重，對馬刺嘅首仗有冇機會落場視乎佢哋嘅意願，我唔會急於叫佢哋復出，畢竟今場只係第一場交鋒。」
太陽今季主場成績甚佳，加上主場曾兩勝馬刺，如果拿殊趕及復出，對住馬刺勝算仍高。
