大帝食塞賀冧莊MVP

NBA賽會昨日正式宣布，勒邦占士成功衞冕今季常規賽MVP殊榮，雖然占士手㬹有傷，但佢完全唔當係一回事，昨仗24投12中，攻入全場最高嘅35分，另外亦貢獻7個籃板同7次助攻，係騎士贏波嘅最大功臣，加上「Mo仔」莫威廉士獻出職業生涯首次入樽，騎士贏波之餘仲攞埋彩！

莫威廉士震撼入樽反敗為勝

塞爾特人半場仲領先緊11分，不過僅得6呎1吋嘅騎士控衞莫威廉士，喺第三節獻出佢嘅第一次，喺皮雅斯頭頂入樽，令全場兩萬名騎士球迷尖叫，亦激發起一班隊友嘅鬥志，打出一段21比9嘅攻勢，成為騎士最終反敗為勝嘅關鍵。

勒邦占士賽後笑稱：「我一早就叫阿莫試吓入樽，我知效果肯定震撼過我好多！」騎士贏波展示王者霸氣，明早將於主場再對塞爾特人，以目前騎士嘅氣勢，大有機會再下一城。

■本報綜合報道