拓荒者小牛預演季後賽

西岸形勢大兜亂！經過尋日多場ＮＢＡ賽事後，西岸前八名又再大執位，其中小牛與金塊分別贏波，兩隊重上二、三位。至於六至八位同樣爭持激烈，一直守喺第八嘅拓荒者尋日以93比85擊敗快艇，加上馬刺、雷霆齊齊於同日輸波，拓荒者成功殺上第六，有望在季後賽避開湖人，不過拓荒者聽朝就遇上硬仗對小牛，後者有可能係佢哋季後賽首圈對手。（無綫明珠台及高清翡翠台周六早上10時直播）

為求在首圈避開湖人，拓荒者近期戰意特別高昂，今場憑近日患上鼻竇炎嘅艾迪列治，攻入最高27分及搶下12個籃板球，萊爾亦交出23分。

山貓晉級創歷史

另登陸ＮＢＡ六載嘅山貓，尋日險勝黃蜂後終於鎖定季後賽席位，寫下球會歷史。至於勇士同日擊敗木狼，教練尼爾遜亦獲得其執教生涯第1333場勝仗，成為ＮＢＡ史上贏波場次最多嘅教頭。