真寧斯個人騷滅熊

賽前嘗到兩連敗嘅公鹿，可謂急需一場勝仗還魂，皆因熱火近期步步進逼，公鹿再輸隨時保唔住第五位置。幸好中鋒波格特今場擺脫背傷重返正選行列，佢上半場就為公鹿貢獻13分，而公鹿半場過後亦領先兩分。下半場戰情繼續緊湊，灰熊喺第四節完結前2.1秒追成84平手，可惜沙蒙斯最後一擊未能命中要進入加時。加時賽就係公鹿天下，沙蒙斯與真寧斯連番得分後，助球隊以108比103贏得艱苦一仗，不過同日熱火亦以97比94擊敗速龍，所以公鹿仍未能安枕。

灰熊季後賽接近絕望

公鹿新秀真寧斯屬今場贏波頭號功臣，皆因佢全場貢獻良多，獲得29分、8次助攻、7個籃板及4次搶截嘅全面數據，至於季中從公牛轉投嘅沙蒙斯，亦有25分進帳。灰熊輸波後，想躋身西岸前八已愈見渺茫，因球隊成績已大幅落後暫列第八嘅拓荒者六場半。