本文重點
與不少現役甲組腳一樣，「o靚焜」也是從青少年足球訓練計劃開始踢波的。實不相瞞，筆者十幾年前曾經殺入過計劃的第四階段。「o靚焜」嘅發展就不俗，佢話：「我係憑實力入選觀塘區，仲記得嗰時羅振邦同陳偉豪都係隊友，陳偉豪仲要踢翼添，不過佢之後『飆高』，先踢中堅之嘛。踢完一心想入體院，不過入唔到，輾轉靠哥哥介紹加入咗流浪青年軍。」
由流浪開始，跟住好易通、西貢朋友再到晨曦，一踢就十幾年，兩個月後就廿九歲的「o靚焜」，現時已是晨曦的老臣子，經歷了晨曦盛世「五冠王」，也走過沒有錦標的日子，對球隊今季的轉變，也該有點意見吧。
以老帶新至啱波路
「我由十幾歲開始已經踢好易通（晨曦前身），其後離開西貢朋友再被招攬加盟晨曦，在球隊多年相處融合，已經培育出一份真摯感情。正如眾多歐洲大會一樣，年輕球員往往係球會最大資產，所以晨曦今季以老帶新嘅方針好正確，你可以睇到「灰熊」（蘇偉泉）同阿澤（白榮澤）愈見大將之風，而聯賽成績亦唔差，仲有機會爭標。」