從會考０分到10張證書

運動員生涯總是短暫，尤其踢波，三十歲前就要想定後路，以免「三字頭」才淪為失業漢。自知不是讀書材料的「o靚焜」，上年鼓起勇氣重返校園攻讀「毅進計劃」，目的就是增加本錢，倘退役後未能延續足球事業，都有能力轉行。

「o靚焜」話：「當年會考只得0分，早知道自己唔係讀書材料，但正所謂書到用時方恨少，人大咗明白到學歷嘅重要，加上有老婆鼓勵，就報讀毅進，獲得同會考五科合格嘅同等學歷，可以申請政府工如警察、消防員嘛。其實劉志強同謝德謙都係我啲同學仔，有時上堂太悶都會傾下偈嘅。」

經過大半年課程，會考0分的「o靚焜」總算圓夢，全科合格一氣拿下十張證書。

「嗰時一星期返四日學，要讀中、英、數、普通話及通識等十個科目，其中有一科係教人與人之間嘅相處，我就最有興趣，因為自己將來都係想教波，而且依家又有份做生意，同人溝通原來大有學問，有助我管理點心舖嘅人事問題。」

毅進畢業戀上讀書

毅進畢業後，「o靚焜」亦因此染上讀書癮，並希望將來能讀一些有關體育的課程，為教練夢鋪路。「我好想可以繼續讀書，特別係讀一啲體育管理、治療，又或者健身等課程，我相信有咗呢啲知識，對做教練大有幫助。可惜學費真係太貴，我又要儲錢買樓，所以會慎重考慮至決定。」

圖／文：梁嘉輝