本文重點
人人都鍾意名留青史，相信活塞後衞哥頓都係，不過，名留青史嘅同時，球隊輸波，其實都幾百感交集！活塞後衞哥頓成為NBA史上奪得第1,000萬分球員，佢喺主場對76人一役，憑住完上半場一次投射得手，達到呢個里程碑，可惜，活塞呢場以94比104輸波，近十二戰全敗，同球會史上最羞家嘅十四連敗紀錄只差兩場。
可惜活塞十二連敗
其實一早已經有人計過數，尋日嘅比賽會誕生第1,000萬分，不過，就唔知邊場波嘅啫，但一班活塞球迷就好唔想突然走佬兼今仗倒戈嘅「AI」艾佛遜可以名留青史，準備噓爆佢，影響佢嘅表現，但「AI」因傷避戰，活塞fans亦都「好夢成空」。
結果呢個1,000萬分由哥頓去完成，當比賽去到完上半場前3分51秒嘅時候，哥頓跳射得手，射入聯盟成立以嚟嘅第1,000萬分，遺憾係佢之後傷出，全場亦僅攻入20分，亦因為咁，間接造就對手76人贏波。
76人前鋒布蘭特創出個人今季新高嘅25分，加埋另外五位球員取得雙位數字得分，活塞最後以94比104敗陣，球隊亦都遭逢十二連敗。
哥頓真係百般滋味在心頭，因為佢有機會集「流芳百世」同「遺臭萬年」於一身，如果活塞再輸多兩場，就會平球隊喺九三至九四球季嘅十四連敗紀錄，即使攞到個「千萬分」得主都唔會開心。
