金塊撼騎士或缺甜瓜

至於明日上演十二場大戰，最矚目係金塊主場對騎士，不過大家未必見到「甜瓜」安東尼同「大帝」勒邦占士嘅對決，因為安東尼早前受傷，已缺席近三場比賽，今仗上陣成疑，騎士有力乘虛而入。 （無綫明珠台周六早上11時30分直播）

騎士狀態不俗，近九場贏八場，勒邦占士昨對巫師獨取廿三分、八個助攻及七個籃板球，帶領騎士大勝廿三分，「巨無霸」奧尼爾僅上陣十七分鐘就攞十七分，兩大主將都咁弗，金塊今場未必頂得住。

另一場矚目大戰係拓荒者主場對湖人，湖人尋日喺「洛市打吡」，爆大冷以九十一比一○二不敵快艇，今季第七次落敗，不過依然排聯盟第一，高比仔手風唔多順，起手三十次先入得十球，睇吓聽朝作客拓荒者能否回復佳態！