美國時間12月30日係「大帝」正日生日，所以一眾騎士隊友賽前都戴上雪糕筒形派對帽，為占士開了一個簡短生日會，不過「大帝」最想收嘅禮物當然係贏波，因為佢對上四次生日都係輸波，而今仗騎士初段發揮唔及鷹隊，半場騎士落後12分。

壽星仔得分最叻奧尼爾

騎士下半場進行大逆轉，「大帝」在第三節領軍打出一段12比2攻勢，一舉追貼至只落後兩分。去到賽事剩餘17.2秒時，雙方打成101平手，此時大前鋒華拿祖突然射出一記三分球，其後騎士再入兩罰球，最終擊敗鷹隊搶得六連勝。

今場表現最佳嘅球員非占士莫屬，佢全場23射15中，三分球6射4中，攻入48分，並得10個籃板球、6次助攻、2個搶截及2個封阻嘅超級數據，生日零舍唔同。不過占士轟入48分只係NBA史上「壽星仔得分」第三高，入得最多分係奧尼爾喺○○年轟入61分。