帖雅娜唐鵬金牌見證

香港「乒乓情侶」帖雅娜同唐鵬修成正果，以東亞運金牌作為結婚禮物。帖雅娜喺東亞運女團決賽帶領港隊擊敗中國，奪得金牌，立即於當晚喺律師朋友見證下，喺港隊下榻嘅酒店同拍拖三年嘅唐鵬簽下婚約，可以話係最完美嘅大團圓結局，佢哋將來會否組成夫妻檔玩混雙，實在令人期待。

費達拿結婚即做老竇

瑞士網壇天王費達拿今年同拍拖十年女伴結婚，一對孖女愛情結晶品仲喺幾個月後出世，幸福滿瀉！而墨西哥高球一姐奧查雅亦泊到好碼頭，夫婿為國內航空公司總裁。印度靚女網球手美爾莎就同相識多年男伴訂婚，令唔少男fans大感失望。

祖高爾連尼加齊做老襯

車路士球星祖高爾同女伴Carly Zucker今年步入教堂，婚禮斥資300萬鎊，有雜誌以200萬鎊買下獨家報道權，幫補番唔少！與此同時，轉行做講波佬嘅連尼加亦同內衣索模Danielle Bux成親，真係羨煞旁人。

張怡寧晏紫忽然出嫁

今年中國體壇頻頻「嫁女」，乒乓球「一姐」張怡寧喺十月同48歲嘅北京富商徐威拉埋天窗，做其少奶奶。雖然兩人年齡相距21年，但並冇妨礙呢段感情。事實上，張怡寧曾承認自己性格比較男仔頭，要搵個年紀較大，可以照顧及容忍佢嘅老公，徐威絕對係佢杯茶。另外，中國「舒拉寶娃」晏紫亦釣到金龜婿，年底同玻璃大王嘅港商李聖根喺深圳註冊結婚。