C朗Paris快閃愛火花

基斯坦奴朗拿度（C朗）今年經歷夢幻夏天，以破世界紀錄轉會費加盟皇家馬德里，同時搭上美國「慾女」Paris Hilton。兩人喺夜店相遇，立即撻着，當場被傳媒影到又攬又錫，十足一對親密情侶，其後更轉場一齊去Paris Hilton妹妹屋企再戰第二回合，因此一度被喻為繼碧咸同維多利亞之後，另一對球壇及娛樂圈嘅天作之合。

不過，激情來得急，退得亦快，加上C朗同Paris兩人同屬玩家，換畫速度極快，好快就冇咗下文。不過兩位人氣巨星剎那接觸，仍然擦出激烈火花，堪稱為09年最快閃愛火花。

畢頓道端愛得癡纏

今年本港娛圈爆出「警鐘胸」索模Jessica C，F1賽場亦有個Jessica艷壓群芳，英國車手畢頓奪取總冠軍，鹹魚翻生人氣勁升，佢個索爆日本名模女友Jessica M（道端Jessica）亦極速走紅，兩人成車壇金童玉女。呢個「F1版畢嫂」係日本同阿根廷混血兒，作風非常豪放，毫不介意同男友親熱於人前，兩人仲試過喺車手休息室纏綿十五分鐘，堪稱09年最冤氣情侶！

劉翔王麗跨出地下情

曾經話搵女朋友比跨欄更難嘅劉翔，被傳與師妹王麗發展地下情！現年二十歲嘅王麗六年前已跟隨「劉天王」恩師孫海平接受跨欄訓練，佢同劉翔可以話係青梅竹馬。雖然兩人否認有戀情，但佢哋平時經常一齊行街、食飯、唱Ｋ、跳舞，早已被認定天生一對。

美斯青梅竹馬打唔甩

新鮮出爐世界足球先生美斯人氣爆燈，但佢早喺今年初已公開戀情，宣告名草有主，佢同青梅竹馬女伴洛古絲素勁啱嘴形，打風都打唔甩。

冰何戀婚紗相斷正

中國「彈床公主」何雯娜同「吊環王」陳一冰睇嚟大纜都扯唔埋，但內地傳媒踢爆呢段「冰何戀」，仲有婚紗相為證，想唔認都唔得啦！

寶娃胡查錫無價的愛

舒拉寶娃不愛巨星、愛奀星，呢位俄羅斯網球天后竟然愛上NBA球隊洛杉磯湖人「二打六」球員胡查錫。講人氣、財富及體壇地位，寶娃都遠在胡查錫之上，寶娃每年收入達2600萬美元，而男方年薪只有500萬美元，講到事業成就女方亦高過男方。

雖然唔少寶娃迷批評胡查錫「癩蛤蟆想食天鵝肉」，但真正愛情超越俗世規範，來自斯洛文尼亞嘅胡查錫亦冇自卑，並多咗份奮鬥目標，希望喺NBA出人頭地，令所有睇唔起佢嘅人收聲。寶娃早已急不及待自爆戀情，高調同胡查錫手拖手行街，力撐愛郎。

奧哈拉羅伊喜見患難情

英超「集郵女星」疑犯羅伊搭上舒寧咸同迪科爾等玩家後，今年情歸畀熱刺借到樸茨茅夫嘅奀星奧哈拉。羅伊曾被襲受傷，兩人共患難後情比金堅，頻傳婚訊。