本文重點
湖人嘅阿堤斯向來畀人感覺「掗掗揸揸」，但呢個「壞孩子」日前竟然發生家居意外，離奇受傷兼出現腦震盪，搞到湖人尋日缺少佢助陣下，作客要經過兩次加時，幾經辛苦先贏帝王112比103，嚟緊幾場湖人冇咗佢，都幾頭痛。
兩次加時 高比搞掂
由於湖人教練積遜批准球員聖誕夜可以同家人過節，阿堤斯就返咗屋企，點知咁就出事。湖人官網透露，阿堤斯聖誕節當日喺屋企行樓梯嗰陣，差錯腳碌咗落地，事後被送入院檢查，後腦同左手手㬹都縫咗幾針，同時出現腦震盪，未知幾時可以復出。
因為阿堤斯突然受傷，湖人尋日作客帝王打到亂晒龍，主將高比拜仁仲喺第三節整傷右手手臂，一度要返入更衣室接受治療，到第四節先復出，兼且要轉用左手射波，結果被帝王追成94平手，搞到要加時。
湖人第一次加時喺一度落後七分下至追平，喺第二次加時終憑全場射入38分嘅高比拜仁，射入兩個致命三分波先取得最後勝利。
其實湖人喺今年聖誕節真係忙到甩轆，五日內要打四場波，之前主場輸畀騎士，尋日作客又要經過兩次加時先贏到帝王，聽日作客火力出晒名勁嘅太陽，喺阿堤斯好大機會缺陣，兼高比仔帶傷上陣下，隨時大敗都唔奇！
■本報綜合報道