花名「灰熊」的晨曦年輕衞將蘇偉泉，憑着高大身形及勤奮好學的態度，不僅獲得教練甄力健器重，更博得港隊教練金判坤認同，在東亞運多次後備上陣。雖然已貴為香港「金牌足球員」，但「灰熊」坦言會更加努力，朝自己訂立的目標進發。
和其他金牌功臣一樣，「灰熊」連日來在街上總會遇到素未謀面，但又可以說出自己全名的人說：「恭喜晒！」「由攞咗金牌第二日開始，我去茶餐廳食嘢或者行街，都有啲我唔識嘅人恭喜我，叫我畀心機！」
有點受寵若驚的「灰熊」，揚言不會自滿，因為他有兩個目標要達成：「我希望可以成為大港腳，同埋幫効力嘅球會捧盃。」
金牌獎金孝敬父母
問及如何運用東亞運奪金所得的巨額獎金，「灰熊」說：「由細到大父母都好支持我踢波，所以我會攞部分獎金孝敬佢哋；另外就會儲起一啲，留番收咧後同父母、女朋友去旅行，因為我咁大個仔都未試過搭飛機唔使帶波砵嘅，每次出外都係比賽或者集訓，所以我好想一家人正正式式去一次旅行。」
香港08出身，曾効力華家堡及東方的「灰熊」，加盟晨曦之初曾感到憂心：「晨曦係大球會，條防線本身已經好強，我睇到高尼路拍羅拔圖打中間嘅演出，心諗自己好難有得踢喎，要成季坐冷板點算呀？」幸而「灰熊」勤奮和積極的態度，換來教練甄力健的信任，安排他頂替養傷的高尼路任中堅，表現愈見進步。晨曦明晚在青衣主場的聯賽迎戰沙田，預計身穿25號球衣的「灰熊」會繼續代替高尼路，夥拍羅拔圖扼守中路。
灰熊知多啲
出生日期：26/03/1988
位置：中堅
身高／ 體重：1米81 ／73公斤
効力球會：晨曦