高比仔賽前右手手指骨裂，食指要纏住紗布，加埋胃痛，但佢仍然堅持上陣，美國傳媒對佢此舉有彈有讚，有人話佢永遠保持着對比賽同勝利嘅渴望，但同時有人彈佢，話佢係球隊大佬，佢要出場冇人阻止到佢，但變相係拖累球隊，結果似乎係後者批評正確。

（美聯社圖片）

放大圖片

新廣告扮鬼扮馬

高比仔雖然努力死撐，但全場24投僅7中，射入16分係全季新低，而胃部不適亦影響咗佢嘅體能。雖然湖人中鋒加素好努力，射入16分取得20個籃板球，但爵士喺迪朗威廉斯貢獻21分及11次助攻嘅帶領下贏湖人8分完場。

高比仔雖然打得唔好，但佢嘅明星地位冇人可以頂替，早前佢為波鞋品牌拍攝新廣告，喺廣告中佢試咗唔同造型，變身愛因斯坦入樽，同時教球迷相對論，跟着又貼晒大鬍鬚扮達文西畫蒙娜麗莎。廣告遲吓會出街，高比迷要留意喇！