本文重點
聽朝ＮＢＡ爆發大戰，回勇嘅馬刺將會面對塞爾特人。馬刺今季效法「綠衫軍」前季奪冠方程式，搵嚟謝法臣與柏加及鄧肯組成「三巨頭」，誓要挑戰總冠軍寶座。三人近期愈見磨合，更首度為馬刺於今季造出五連勝，挾連勝氣勢，主場有力掃走塞爾特人。 （now 670周五早上９時直播）
今季實力大幅提升嘅馬刺，季初表現的確令人跌眼鏡，前十場竟錄得四勝六負，以佢哋雄厚班底實在難以接受。不過，自從上月中恥辱性經歷三連敗後，球隊近期狀態已返晒嚟，尤其係鄧肯願意挺身而出分擔得分責任，近四仗都交出20+得分，所以馬刺亦造出五連勝，重返前八位置。
「綠衫軍」鬥同級球隊冇着數
其實馬刺今季確實有塞爾特人影子，兩軍球員質素平均，唔會好似騎士或熱火咁要勒邦占士或韋迪孭重飛。除「三巨頭」外，後備又有真路比利及芬尼等經驗射手，班底唔會差得過「綠衫軍」。
雖然塞爾特人今季只係輸過四場波，但球迷要留意「綠衫軍」今季對住同級球隊都攞唔到甜頭，分別輸過畀太陽、鷹隊及魔術，足證塞爾特人大戰表現分外失色；而且球隊昨日先作客完對山貓，聽日又要作客到聖安東尼奧，體力上點都有啲輸蝕，馬刺擁主場之利可以睇高一線。