本文重點
「大帝」勒邦占士輸波之餘輸埋面子！眾所周知占士第一仇人就係巫師嘅史堤芬遜，呢位「大茄」後衞由○八年開始多番挑釁「大帝」，搞到兩人經常隔空罵戰。占士尋日就作客到華盛頓會仇人，結果騎士缺少奧尼爾及華拿祖之下，佢都單天保唔到至尊，尾段仲要入樽傷埋，畀仇人史堤芬遜攞晒彩！
騎士尋日作客巫師，對於占士嚟講可謂別具意義，皆因佢可以同仇人史堤芬遜正面交鋒。雖然後者只係一名後備兵，但○八年季後賽時，佢向傳媒表示勒邦占士只係被人高估嘅球員，其後對賽又不斷向「大帝」施以粗野攔截，搞到連占士好友Jay-Z都要作歌鬧爆佢！此外，占士近期呼籲NBA球隊向「波神」米高佐敦致敬，將23號球衣榮休，史堤芬遜竟然率先表態明年要改穿23號，擺明要落占士面！
缺雙塔大敗17分
但巫師尋日藉騎士有奧尼爾及華拿祖「雙塔」缺陣下，憑占美臣着火攻入31分，加上卡朗畢拿、米克米拿及亞連拿斯都分別攻入17分以上，結果輕鬆以108比91大勝騎士。雖然占士轟入全場最高34分，但第四節剩餘兩分多鐘嘅「垃圾時間」，佢竟然入樽時不慎傷及左手腕，要提早退下火線，今次真係乜都輸晒。