迪倫威廉士勁跌Watt

近年逐漸冒起嘅爵士，今季竟然打回原形，開咧成績三勝五負，令人大跌眼鏡。爵士失準主要因為領袖迪倫威廉士近況差，呢位控衞近兩戰打得冇神冇氣，前仗對紐約人時，佢竟然十射僅得兩中，五次三分投射更加全部炒粉，最終只得五分咁大把。而尋日面對塞爾特人嘅朗度亦完全將佢比下去，後者投射準繩兼交出十一次助攻，相反迪倫威廉士就只得十三分及四次助攻，近態明顯唔達標。

雖然76人今季表現亦未算驚喜，但球隊勝在識揀波贏，面對同級球隊頗有把握。76人今季先後贏過公鹿、籃網及紐約人，其實三支球隊都係狀態較沉嘅球隊，所以76人都算擅打落水狗，尤其係有主場之利時。不過，其實兩軍攻力都麻麻地，就好似76人，近五戰有三場得分唔過八十三分，而爵士近三戰亦唔過百，所以估計今場總得分都會較低。