本文重點
NBA明早上演西岸決賽翻版戰，由上季「阿二」金塊，主場迎戰總冠軍湖人。雖然金塊狀態回落，近四戰輸足三場，但基於上季被湖人擯出局，球隊一直深深不忿，今季首次相遇，正好來個大復仇！再者，金塊已有「狂人」JR史密夫停賽期滿復出，有番呢位三分射手在陣，戰力復整，湖人作客惡唔出樣。 （無綫明珠台周六早上11時30分直播）
上季西岸決賽，金塊一度同湖人打成二比二平手，可惜球隊稍欠經驗之下，最終輸二比四出局，相信唔少球迷都記憶猶新。
加素缺陣驚少瓣
不過，有留意呢個系列賽嘅朋友，都知道湖人中鋒加素係贏金塊嘅無名英雄，呢位西班牙國手於該六場賽事中，有四場搶得全場最多籃板，同時在防守上亦令簡安馬田及連尼冇啖好食，成金塊心腹大患。
不過金塊今場可以放心，因為最新消息指加素需要養傷多兩周，而教練積遜更已有晒心理準備，隨時要到聖誕節左右先見到加素復出，湖人內線仲未齊人。除咗剋星缺陣外，天時及地利都以金塊較為佔優，皆因湖人今日先打完對太陽嘅西岸大戰，休息不足一日就要再戰金塊，體力難免有輸蝕。此外金塊主場向來有保證，上季常規賽得勝率超過八成，今季亦保持全勝，湖人作客嚟到確實唔易打。
再者，金塊射手JR史密夫尋日已正式復出，面對公鹿後備上陣亦交出18分表現，狀態算係keep得唔錯，金塊今場應可藉主場之利及主將復出下，復仇成功。