（中央５台周三早上９時30分直播）

小牛多年來都係攻強於守嘅球隊，魯域斯基、傑特同泰利等得分能力極強，但防守一向係球隊弱點，以上季為例，小牛得分少於一百分嘅賽事，戰績為十八勝二十三負，可見進攻球員一死火，小牛就凶多吉少。

火箭遇「小球」鼻祖冇運行

不過小牛今季加強防務，戰績有明顯改善，即使今季有四場賽事得分都喺一百分以下，依然取得三勝一負佳績。小牛將於未來七日連打五場，最後四場更係作客賽事，所以小牛一定想喺呢場德州打吡贏波壯聲威。

至於季初冇咗姚明同麥基迪兩名主將嘅火箭，表現其實亦唔差，球隊今季經常起用雙控衞打法，讓布魯克斯及盧維兩名矮仔同時上陣，往往能夠突襲對手，但小牛係打「小球」嘅鼻祖，陣中又有傑特同泰利兩名高質後衞，火箭想用呢招贏小牛，好難咯！