本文重點
西岸雙雄再下一城！兩支季初帶出嘅西岸球隊鳳凰城太陽同洛杉磯湖人，尋日再度贏波，湖人半場已KO對手，主場輕取新奧爾良黃蜂一○四比八十八；而太陽作客亦以一○二比九十擊敗華盛頓巫師，創下球會歷史上最佳開季成績，兩支球隊目前喺西岸領導群雄。
先講湖人對黃蜂一仗，湖人今仗雖然有拜林同加素兩名「大隻佬」缺陣，但表現一啲都冇受影響，高比拜仁半場獨取二十六分，令湖人上半場領先黃蜂十七分，換邊後湖人更打出一段十七比三嘅攻勢，將比數拉開，令餘下賽事成為「垃圾時間」。
高比仔近期手風相當順，之前四仗有三場得分喺四十分之上，今場勒住打都有二十八分進帳，不過湖人今場另一贏波功臣係沙朗布朗，呢位「大後備」今場演出神勇，爆籃同外投乜都有，為湖人進帳十五分。
太陽創球會開季最佳
另一場太陽作客對巫師，太陽五名主力均交出雙位數得分，控衞拿殊更交出十七次助攻，不過拿殊仲嫌贏得少：「呢場我哋表現一般，我哋應該贏廿分至合理，可能係今季首次打日波嘅關係，球員體力好似唔多夠。」
贏波都仲嫌三嫌四，拿殊對自己要求咁高，難怪太陽季初咁弗啦！太陽同湖人都係六勝一負，分別排西岸第一、二名，暫時聯盟中只有東岸嘅塞爾特人得勝率較呢兩隊高。
■本報綜合報道