寸嘴霸王奧尼爾

曾經威震聯盟，手執四隻冠軍指環嘅奧尼爾，向來狂妄自大，Rap歌寸高比仔之餘，近年亦狂踩正在上位嘅杜域侯活。可惜呢位狂人近年大走下坡，上季更自新秀賽季後，首次冇份打季後賽，相反兩大「死敵」高比、侯活就齊齊打入總決賽，佢都算冇面。但奧尼爾今季有機會翻身，因騎士GM費利終換得「大鯊魚」到克利夫蘭，扶助「大帝」勒邦占士成大業，以奧尼爾嘅內線霸者地位，的確可以改善騎士嘅內線力量。

奧尼爾Shaquille O'Neal

位置：中鋒　年齡：37歲 身高：7呎1吋

上季平均得分：17.8分

上季平均得分：17.8分

轉會：太陽→騎士

實用指數：★★★★★

經典狂人阿堤斯

要數NBA經典狂人，點可以冇阿堤斯！呢位前鋒曾經因為毆打球迷被罰停賽七十三場，又試過着浴衣參與球隊訓練等荒唐行為。佢喺場外同樣瘋狂，試過因為家庭暴力被判入獄，總之就壞事做盡，難怪有唔少湖人球迷都質疑，點解球隊羅致阿堤斯都唔保留阿利沙，雖然前者能力較高，但佢係一枚計時炸彈，隨時出事。不過，阿堤斯都有可愛一面，佢加盟湖人後改穿37號，就係為咗紀念離世嘅米高積遜，因MJ曾憑大碟《Thriller》，坐上三十七星期大碟榜冠軍。

阿堤斯Ron Artest

位置：小前鋒　年齡：29歲 身高：6呎7吋

上季平均得分：17.1分

上季平均籃板：5.2個

轉會：火箭→湖人

實用指數：★★★★

怒吼天尊拉舒華萊士

能夠効力「壞孩子軍團」活塞多年，拉舒華萊士早已躋身聯盟一線「惡人」之列。呢位大前鋒出道以來一直係球證公敵，皆因佢出名口水多、犯規多同茅招多，○○至○一年球季就食咗四十一次技術犯錯，仍然係NBA史上單季攞得最多技犯嘅球員。

雖然華萊士近年隨活塞一同屢走下坡，但「噩夢」已經結束，皆因佢今夏以自由身加盟前季總冠軍塞爾特人，與「三巨頭」加納特、皮雅斯及雷阿倫組成「四大天王」，令人期待。

拉舒華萊士Rasheed Wallace

位置：大前鋒　年齡：34歲 身高：6呎11吋

上季平均得分：12分

上季平均籃板：7.4個

轉會：活塞→塞爾特人

實用指數：★★★★

撰文：梁嘉輝