有人話：「死讀書、讀死書，只會讀書死」，專門幫學生補習英文科嘅英皇補習小天后Enfany，唔單止英文叻，去玩都咁醒。Enfany認為讀書咁辛苦，都要去郊外輕鬆吓，呼吸吓新鮮空氣，佢會帶大家去大美督，教大家只係用七十蚊就可以玩盡海陸空，價錢咁抵，好過去主題公園啦。
踩單車出埋大壩
嚟到大美督，最緊要係享受靚景同呼吸新鮮空氣，要玩到盡，Enfany話可以分開「海」、「陸」、「空」三個方式享受，最方便係任何裝備都唔使帶，只要入到大美督，七十蚊就搞掂晒。
Enfany教大家第一件事，就係去租單車代步：「原來好多人以為大美督燒烤場已經係嗰度嘅盡頭，其實喺燒烤場旁邊，仲有一條小路，越過欄杆向上行，就會到達船灣淡水湖嘅大壩，嗰度踩單車好舒服。」至於租單車就可以喺停車場對面馬路，嗰度有一列單車舖，最低消費三十蚊就可以租一日。
放完風箏再划艇
租完單車，Enfany教路大家可以踩去燒烤場附近嘅士多，喺呢度用廿蚊買個靚靚風箏，翱翔天「空」：「大壩上面有好多位置，上面風夠大而且地方廣闊，即使未放過風箏，一樣可以喺呢度成功放上天，好有成功感。」
數數手指，依家只係用咗五十蚊，就用單車感受到「陸」同風箏喺「空」中飛，咁「海」又玩咩呀？原來係划艇！Enfany帶我哋去燒烤場側邊嘅士多，呢度有得租艇，細艇只係廿蚊一個鐘，仲可以坐兩個人：「如果一人夾一份，仲只係十蚊添。我仲知道有啲人鍾意釣魚，大家可以帶埋魚具上艇仔，撐出去吐露港釣魚，但大家要注意海上安全呀！」
See through Enfany
姓名：Enfany（陳婉祺）
就讀中學：
鄧肇堅維多利亞官立中學
大學學歷：
中文大學英文系碩士生
理工大學語文系榮譽學士
身高：164cm
體重：45kg
嗜好：Drama，電影
最喜歡的書：挪威的森林
（村上春樹）
最喜歡的食物：朱古力
口頭禪：畀心機
此路必通
大美督位於大埔八仙嶺附近，唔算好偏僻，但喺市區入去，必定要到大埔東鐵站轉乘巴士或專線小巴，唔使半個鐘就到；或者自己揸車去都得，入面有好多車位。除此之外，亦有唔少人喺大埔租單車出發，沿吐露港側及汀角路的單車徑前往大美督。
巴士路線：75K
275R（公眾假期）
專線小巴路線20C
圖／文：周兆年