PGA賽首天帶出

2016年奧運新增項目呢場「大龍鳳」終於到戲肉，國際奧委會（IOC）公布一個足以改變「體壇生態」嘅重大決定，投票通過推薦高爾夫球及七人欖球納入2016年奧運，成為28個比賽項目之一。早已表明對奧運金牌流晒口水嘅「老虎」活士，唔知係咪受利好消息刺激，喺美國PGA錦標賽首天即打出驚人嘅67桿領先，而受惠於奧運嘅連鎖利益反應，相信活士嘅體壇首富地位更加牢不可破。

IOC執委會周四喺柏林開會，除咗決定女子拳擊加入2012年奧運外，同時投票選出兩個奧運新項目，最後高爾夫球及七人欖球力壓其餘五項，包括壁球、空手道、滾軸運動、棒球及壘球，將被推薦到十月份嘅IOC會員大會上，由106個會員「循例」表決通過。換句話說，高爾夫球將繼1904年後，重返奧運大家庭，世界各地將藉舉行更多比賽提升水平，從利益角度嚟睇，高球成功在「奧運金礦」插旗，可望賺取天文數字嘅利益。

大家不妨用股票市場嘅概念去理解高球加入奧運後嘅利益。消息一出，原本地位等如「二三線股」嘅高球，迅即升格為奧運「大藍籌」，「大股東」活士將藉着大財團（「Fund佬」）泵水令熱錢流入，比賽獎金提升、企業贊助合約增多、甚至係設計興建新球場等，如雨後春筍嘅新機遇，身價進一步水漲船高。

奧運效應 財源滾滾

活士在《福布斯》公布嘅今年體壇富豪榜，以年賺1.1億美元（約8.6億港元）連續八年榮登體壇首富。如今更得到「股神」羅格（IOC會長）發功，「老虎」可謂「虎盡金來」，不但有機會為美國爭「金」牌，荷包更加「金」錢大躍進。

活士談及高球重返奧運時說：「我一定會盡我所能參加奧運，即使到時已四十歲，只要我未退休，我必定要親身感受奧運獨一無二嘅比賽氣氛。」目前活士擁有十四項大滿貫錦標，距離「金熊」尼克勞斯嘅十八項紀錄只差四項，但如果佢能夠爭得奧運金牌，史上最偉大高球手嘅榮譽肯定當之無愧。