本文重點
二傳手被喻為一支球隊嘅靈魂，如「黃金一代」嘅隊長馮坤，她能洞悉形勢、一眼關七，將球升到一個最有利嘅位置，而我亦高興見到新女排嘅魏秋月順利接棒，到目前為止佢嘅表現值90分。
魏秋月只有二十歲，身材不算高（只有１米82），但技術及應變能力已非常一流，控球好穩，即使隊友一傳不到位，甚至交出一個「迷惘波」，但係魏秋月都可以單手或快速想出方法作出修正，顯示其頭腦十分靈活，係佢嘅優點之一。
中國女排嘅戰術打快速多變，魏秋月將呢項優勢進一步提升，喺今季比賽，睇得出佢加快咗全隊進攻節奏，而穩定性方面亦做得上佳，我喺澳門睇中國女排對巴西，魏秋月整場波控制節奏及處理戰術變化都表現恰如其分，如果要我打分，我想佢值得90分（即使最後輸波）。
有埋虛攻更Perfect
究竟魏秋月還欠甚麼才接近完美？我想其中一環係虛攻吧，打二段攻擊要求二傳手有「膽識」，好似馮坤以往失驚無神嚇對手一個措手不及，令球迷大嘆精彩，我期待魏秋月經過更多時間嘅浸淫後，能夠訓練到呢種破壞力，說不定會成為比賽嘅致勝關鍵。
世界女排大獎賽 市務總經理
國際教練鄭景亮