經過刻苦鍛煉、積極瘦身嘅王一梅，成功減少身體負荷，跑動大大改善，據內地傳媒報料，大梅喺前期訓練逼自己游長途泳，已大幅減磅近十公斤。早前寧波站，佢嘅表現令我留下好深刻印象，佢嘅發球、後排攻擊，無論喺角度同落點都好大進步，而人重嘅優勢係扣殺力量亦大，所以佢成為中國隊得分王，非常搶鏡。

４號２號位都有重炮

喺蔡斌嘅悉心安排下，大梅由打開４號位強攻，改為主要打２號位接應二傳，即係同升球手打對角，而同一時間又有李娟、惠若琪或殷娜等在前排，換言之中國喺４號同２號兩個位置都放置咗重炮，攻擊點拉闊咗，令對方攔網更難以捉路。

再者，相比以往周蘇紅嘅接應二傳，大梅嘅「瓣數」更多，佢可以打強攻、又可個人突破。所以我覺得呢個調配好聰明，亦將成為中國隊嘅致勝殺着。

世界女排大獎賽　市務總經理

國際教練鄭景亮