本文重點
被視為全港「G界」籃壇至Hot盛事嘅「NIKE LEAGUE」，將於今日起一連四日上演終極Playoffs（季後賽）！不過，咪以為喺十九歲以下組（U19）常規賽只係輸過一場嘅銀鷹及雄獅係大熱門，皆因佢哋同樣都有兩大主力要喺今日飛赴長沙出戰「全國中學生運動會」，實力大打折扣，但數到最慘情非藍鳥莫屬，因為佢哋有殷兆俊、孫顯洋、葉俊傑及黃灝賢四大主力獲徵召，只剩番八個球員出戰今日嘅四強戰首回合，真係幾大鑊㗎！
經過近五十場激戰後，躋身「NIKE LEAGUE」季後賽嘅勁旅將喺今日現身，出戰四強首回合賽事，但由於賽事撞正「全國中學生運動會」，所以有唔少十八歲以下嘅香港代表要「半途而廢」，冇得留低打季後賽。
殷兆俊Push隊友
影響最大嘅係U19嘅藍鳥，皆因佢哋全隊十二個球員中，有四個最勁嘅主力同時被抽起，剩低八個隊友應戰，今日準決賽想唔輸都幾難！
不過，冇份打今場波嘅藍鳥主力殷兆俊就話對隊波有信心：「雖然冇咗我哋四個，但對手雄獅都冇咗鍾俊昇同魏俊銘，其實都差唔多咁啦！為咗令球隊適應新陣容，喺常規賽都專登畀多啲機會新人落場，好似個中鋒袁嘉豪咁，佢就試過一場轟入卅六分，我對班隊友都好有信心，希望由長沙返嚟嘅時候，可以收到Coupon啦（賽事冠、亞軍將獲得現金券作獎品）！」