本文重點
為避免整季報銷，姚明與火箭隊醫已達成共識，決定再一次為傷痕纍纍嘅左腳做手術，徹底根治骨裂並期望下半季（09／10球季）能趕及復出。而火箭亦開始為姚明長抖作準備，球隊即將簽入魔術自由身球員哥達，補充內線力量，而另一單重磅轉會就落於活塞，球隊宣布簽入公牛主力哥頓及公鹿前鋒維蘭紐華。
雖然姚明前三次骨折都能恢復過來，但今次左腳骨裂未能愈合，的確令人擔心，再者，姚明年紀日漸增長，手術必定會為其帶來風險，若然有任何差池隨時影響其職業生涯，甚至帶來後遺症。不過「小巨人」出席記者會時，仍非常樂觀：「我現在只能保持樂觀態度，等待希望來臨。」
活塞重金禮聘哥頓
據火箭隊醫表示，只要姚明盡快完成手術，大有機會於下半季復出，若然火箭能殺入季後賽，到時就可以幫到手。而火箭亦與魔術自由身球員哥達傾掂數，呢位波蘭籍中鋒將會加盟火箭紓緩姚明長抖嘅影響。
另方面，活塞亦作出重組第一步，從公牛簽入自由身球員哥頓，增強球隊得分能力。活塞ＧＭ杜馬斯為哥頓提供一紙五年5,500至6,000萬美元合約，壓過多支球隊獲得呢位射手加盟，此外，球隊亦簽入公鹿前鋒維蘭紐華，進一步年輕化。