靚女都走去做Gym，唔怕練到啲肌肉一舊舊，成個「男人婆」咁咩？如果咁諗就真係「Out到無朋友」嘞！就以今集《夏娃兒》嘅主角余迪希（Heidi）為例，本身係任職航空公司，收工後除下制服，穿梭「男人堆」嘅健身室，練出至fit線條，並喺「健體小姐」比賽（Ms. Bodyfitness Championship）中獲獎無數！Heidi話做Gym唔係「大隻佬」專利，女仔玩Bodyfitness亦可以練出最靚身形，展示出線條美態！
健美健體唔好撈亂
已經玩咗Bodyfitness四年嘅Heidi，喺香港嘅健體界論輩分可以話係開山祖師，○六年舉辦嘅第一屆「全港健體小姐比賽」，佢已經攞到亞軍。Heidi就話要了解健體呢項運動，就必須先糾正一般人嘅誤解。
Heidi話：「有好多人將健美（Bodybuilding）同健體撈亂咗，健美係要Show到啲肌肉好大舊，而健體就係注重肌肉線條、體形比例等去計分，比賽時要做三個自選動作，畀評判去畀分。不過，好多人仍然對做Gym有誤解，覺得係好男性化項目，但其實『健體小姐』係要展示身體美感，而我揀佢都係因為可以令身體健康之餘，又可展露自己嘅美態。」
艱苦節食靚的代價
上屆因忙於工作而未有參戰「全港健體小姐比賽」嘅Heidi，今年捲土重來即時又贏得亞軍。佢就話每次參賽前要節食都令佢最難忘：「比賽前幾個月就要密集式收身，但又要小心做Gym要平均，唔好做到啲肌肉一舊大、一舊細。另外，最艱苦嗰Part當然係節食啦！因為要節食，身體好易攰，但仍要頂硬上放工趕去做Gym；賽前兩、三天要『去水』，少飲水但又要繼續出汗，真係好辛苦。不過，我好享受喺台上展現自己最靚一刻，即使幾辛苦都抵番晒。」
Heidi又話，每次比賽後，最想就係食佢最愛嘅馬拉糕，暫時唔使再日日捱青瓜、番茄、白烚雞肉、蛋白嘅節食餐單。
大隻妹四圍飛
為咗要有穩定嘅公餘時間嚟訓練，Heidi畢業後雖考入一間大型航空公司，但卻寧願揀做地勤而拒絕「飛」。不過，自細鍾意去旅行嘅佢，卻能夠享用員工優惠買平價機票，短短時間內Heidi已經周遊列國，到各地體驗人生。
圖、文：司徒子文